Stockholm啱啱踏入夏天，周街都係蒲公英。記得細個嗰時喺香港都成日見到蒲公英㗎，大大下就好少見到。而家一次過見到咁多，唔知點解反而有啲傷感。
我同程仔講：「細個香港都有好多蒲公英㗎，嗰陣都唔使做啲咩，吹下蒲公英就已經好開心。」可能程仔睇得出我又emo病發，講到哽咽咁。佢跟手抆咗支蒲公英畀我，話：「其實你而家吹蒲公英都可以好開心㗎。」
見公園有其他人，我大人大姐拎住支蒲公英初頭都唔好意思，不過心諗唔抆都抆咗，唯有豁出去大吹特吹。發覺原來大個咗吹蒲公英都真係仍然好開心，而且覺得幫到佢哋播種，好似做緊好事咁，於是我又笑返了。:o)
飛呀蒲公英！要飛遠啲，飛高啲，飛到地球每一個角落，落地生根，令到多啲人笑返。當世界變得越嚟越陌生時，慶幸還有蒲公英，勇敢單純而美好地存在著。
Search